Mən günəş altda yanmağı,

sən qara  batıb donmağı

sevə-sevə yaşamışıq –

öyrənmişik dolanmağı!

***

Sən gecələr ulduzsayaq,

mən gündüzlər quş tək oyaq,

heykəllərimiz baş-başa,

ürəklərimiz baş-ayaq.

***

Sən güllərə su tökəndə

görməzsən susuzam mən də,

namaz qıllıq, salam verrik,

sən bir dində, mən bir dində.

***

Nə qədər yoldadı ölüm

yaşamaq lazımdı, gülüm,

dünya budu, adəm budu,

düzəlməz, qoymaz düzəlim.