Bəli, qorxuram yazmayım. Beş nəfər də olsa yazmağımı istəyirsə, demək azı o beş nəfərə borcluyam. Qələmlə, fırça ilə, dillə, əllə bu dünyanı gözəlləşdirə bilirsənsə, yerində otursan daşsan – toz basmış, üstəlik yoldan ötənin ayağına ilişən daş!

Yazmağın ağır bir şərti də var. Bir tələbə  elmi işinin qovluğu üzərinə öz adını səliqə ilə, böyük hərflərlə, elmi rəhbərinin adını necə gəldi yazır. Qovluğu müəllimin stolu üstünə qoyanda ayılır ki, ey dili-qafil, nə böyük qələt eləyib! Müəllim təkcə öz adının kiçik, diqqətsiz yazılmasını havada tutmur, elə tələbənin buna görə narahat olduğunu da hiss edir. Deyir mən universitetə ayaq qoyduğum gün Allahla əhd etmişəm ki, tələbə atamı öldürmüş, dalımca fit çalan biri də olsa, kin-küdurəti kənara qoyum, biliyini düzgün qiymətləndirim… Qorxma! –  deyir.

Bəli, sənə toxunan sözləri, adamları bir kənara qoyub yazmaq çətindir. Deyərdim ki, hər kişinin işi deyil. Əlbəttə ki, sənə zülm olubsa, sussan pis olarsan. Amma zülmə də zülmlə cavab vermək yaramaz. Belə etsən elə sən də zalımsan. Allahtərəfi danışaq…

Feminizmdən danışmaq istəyirəm. Bəli, çox danışmışam, amma bəs etmir. Bu dəfə feminizmin çayldfri – övladdan imtina layihəsi, kampaniyasından danışmaq istəyirəm. Danışmaq yox, bu soyqırımı yada salıb tamamlayacağam. Feminizmin nəfəsi dəyən bütün cəmiyyətlərdə  doğuş (doğum) azalır. Dünyanın iki böyük bəlası – imperializm və sionizm müsəlmanların neft quyularından çalıb-çapdıqlarından  vaqon-vaqon prezervativ, kontrasept istehsal edib dünyaya geydirir, yedirir.

Müasir qadın uçuruma gedir deyirəmsə, kişilər özünü rahat kənara çəkməsin. Bir dəfə kənddən qonaq gəlmiş qohum ərlə arvada namazın faydalarından danışırdım. Kişi  stula gərnəşib ittihamla arvada baxdı, “niyə qılmırsan” dedi!! Özü qılırmış kimi!

Müasir qadını uçurama aparan elə müasir kişidir. Qadın və kişi yalnız bir müstəvidə bərabərdir: Allahın halal və faydalı nemətlərindən istifadədə! Bəli, halal zərərli də ola bilər. Qan təzyiqi olana, şəkəri olana çox şey zərərdir. Dünyanı qatanlar arasında halal-haram bilməyənlərin payı o birilərinkindən çoxdur.  Deyəcəklər nə üçün kişiyə dörd arvad almaq halaldır, qadına dörd kişiyə getmək haram? Çünki zərərdir! Bəşəriyyətə, cəmiyyətə, ailəyə zərərdir. Halala çıxardılar ki, qadın bu günə düşdü. Əslində kişi də bir qadınla evlənsə ətəyi zülmə batmaz – İslam deyir ki, birdən artıq qadınla evlənən kişinin ədaləti, bərabərliyi gözləməsi çətindir.

Kişi qadını uçuruma apardı və qadına şeytan dedi. Əslində kişilər qadından şeytan düzəltdi. Kaş tarixi saniyə-saniyə monitorda izləyə biləydik. Görəydik ki, çimərlik, striptiz, şortik, dekolte, qısa yubka, cırıq şalvar, açıqyaxa köynəyi kim icad edib, qadına ilk dəfə şərabı kim içirib! Bəlkə deyəsiz elə kişiləri də qadınlar zorlayıb?! Müqəssir kişilərdir və bu gün öz təqsirinin zəhərini (feminizmi) nuş edir.

Qadını analıq həzzindən məhrum etdilər. Çayldfri –  övladdan imtina da kişilərin fitnəsidir. Doğan, ya çox doğan qadın gözəlliyini itirir dedilər. Kişilərin də başı üzərində insan nəslini bədbəxt etməyə and içmiş İblis dayanır.

Qadın özünü xilas etməlidir. Cənnət qadının ayaqları altında deyil, ananın ayaqları altındadır. Analıqdan həzz almayan, eyş-işrət dalınca sürünən sümsük qadına heç cəhənnəmdə də yer yoxdur. Ümumiyyətlə, cəhənnəm məncə daha çox kişilərin yeridir. Allah günaha sövq edəni qoyub günaha sürüklənənləri cəzalandırmaz. Allah zorlanmış qadını cəhənnəmə salmaz. Müasir qadını uçurum kənarına gətirən kişilərdi – baz, manyak, sutinyor kişilər.

Qızım, bacım! Kaş sənin üçün cızılan çirkin planlardan xəbərin olaydı. Feminizm bu fitnələrin mindən biridir. Səni analıq həzzindən məhrum etdilər. Güzgü qarşısında özünlə oynamaq balanla oynamaqdan şirin oldu. Hər şirinliyin bir acılığı da var. Sənə dua edirəm, Qadın! Yazıq qadın, feminizm kimi tələləri qurtuluş yolu görən məst qadın!

Aran  Eyvaz

aran.eyvazli@gmail.com

WA +989190660090